მოგესალმებით ამირან,

საკრებულოს წევრის „სანქცირებაზე“ საუბრისას, პირველ რიგში უნდა ამოვიდეთ ამ პირის განმწესების წესიდან და ფუნქციებიდან. საკრებულოს წევრი არის მოსახლეობის მიერ გარკვეული ვადით არჩეული წარმომადგენლობითი ორგანოს წევრი. მისი ფუნქციაა იყოს იმ კოლეგიური ორგანოს წევრი, რომლის ძირითადი ფუნქციაც არის  ადგილობრივი პოლიტიკის დადგენა, რეგულირება და აღმასრულებელი რგოლის კონტროლი. საკრებულოს წევრის უფლებამოსილებებიც, სწორედ ამ ფუნქციებიდან გამომდინარეობს - წარადგინოს წინადადებები, იყოს კომისიის წევრი, მიიღოს მონაწილეობა სხდომებში, გააჟღეროს წინადადებები, დასვას კითხვები და სხვა. თუ არ ჩავთვლით საკრებულოს თანამდებობის პირებს, ის თავის უფლებამოსილებებს ახორციელებს საზოგადოებრივ საწყისებზე და ამისთვის არ იღებს ანაზღაურებას (გარდა უფლებამოსილების განხორციელებისთვის აუცილებელი ხარჯების ანაზღაურებისა). საკრებულოს წევრი ძირითადად ახორციელებს ისეთ უფლებამოსილებებს, რომელის ავკარგიანობა, შეფასებითი კატეგორიაა და ეს უნდა გააკეთოს ამომრჩეველმა ყოველი არჩევნების დროს. სწორდ აქედან გამომდინარეობს კანონმდებლობის მიდგომა, რომ საკრებულოს წევრის უფლებამოსილებების შეწყვეტის საფუძვლებად მითითებულია განსაკუთრებული შემთხვევები (შემთხვევები რაც შეუძლებელს ხდის მის მიერ უფლებამოსილების განხორციელებას) და ეს საფუძვლები მეტწილად დაკავშირებულია ობიექტურად დადგენად ფაქტებთან (არასაპატიო მიზეზით ზედიზედ 6 თვის განმავლობაში არ მონაწილეობს მუნიციპალიტეტის საკრებულოს საქმიანობაში, დაიკავა სტატუსთან შეუთავსებელი თანამდებობა და სხვა). შესაბამისად, საკრებულოს წევრის „სანქცირება“ დისციპლინური პასუხისმგებლობის დაწესების გზით ვერ მოხდება. მას შეიძლება დაეკისროს პოლიტიკური პასუხისმგებლობა ამომრჩევლის მხრიდან (მისი აღარ არჩევით) ან მას შეიძლება შეუწყდეს უფლებამოსილება განსაკუთრებული, ობიექტურად დადგენადი ფაქტობრივი მოცემულობის დროს. რადიკალურად განსხვავებული მდგომარეობაა საჯარო მოხელის შემთხვევაში, რომელიც სამსახურში, პროფესიული ნიშნით კონკურსის წესით უვადოდ ინიშნება. დადგენილია მისი პერიოდულად შეფასების სისტემა, მისი დისციპლინური პასუხისმგებლობის საფუძვლები - წესები, გათავისუფლების საფუძვლები და სხვა. შეჯამების სახით, რომ ითქვას, განსხვავებით პროფესიული მოხელისგან, საკრებულოს წევრი არის არჩევითი პოლიტიკური ფიგურა და მისი პასუხისმგებლობის საკითხიც აქედან უნდა გამომდინარეობდეს.